Nyheitsbrev oktober 2026
Veksthuset for verdiskaping – eining for innovasjon og næringslivssamarbeid for livsvitskap, helse og teknologi i Livsvitskapsbygningen.
Kunnskap i bruk: 1,7 millionar kroner til innovative UiO-forskarar
I haust lyste Veksthuset for verdiskaping ut såkornmidlar til forskarar ved UiO som vil vidareutvikle eigne innovasjonsidear med mål om at forskinga skal bli teken i bruk.
Vi fekk inn 44 kvalifiserte søknader. Av desse får fem prosjekt no 200 000 kroner og fjorten prosjekt 50 000 kroner. Vi gratulerer!
Alle søkjarane får tilbod om oppfølging frå Veksthuset.
Andre moglegheiter for interne innovasjonsmidlar ved UiO i haust:
- SPARK Norway – innovasjonsprogram for helserelatert livsvitskap, frist 12. november
Innovasjonskonferansen Science Impact 2026 i bilde
På UIO sin årlege innovasjonskonferanse Science Impact – tomorrow's solutions start today 21. oktober deltok 350 forskarar frå akademia, sjukehus og instituttsektor samt tilsette i oppstartsselskap og større firma.
På konferansen fokuserer vi på moglegheitene som ligg i samarbeid mellom akademia og næringsliv og rammevilkår som trengs for at forsking skal bli teken i bruk til nytte for pasientar og samfunn.
I år hadde vi sesjonar om beredskap; immunterapi og kreft; rein produksjon av energi og produkt; autoimmune sjukdomar; og kvanteteknologi og framveksande teknologiar.
For første gong arrangerte vi pitsjekonkurranse for unge talent. Den vart vunnen av Amanda Frøynes frå oppstartsselskapet Outrun som fekk talentprisen for Science Impact 2026.
Sjå video med bilde av alle dei flotte innleiarane som var på scena (< 3 minutt med musikk):
Konferansen var ein del av Oslo Innovation Week 2026.
- Hovudarrangør: Veksthuset for verdiskaping
- Interne partnarar UiO: Det medisinske fakultet, Det matematisk-naturvitskaplege fakultet, UiO:Energi og miljø og Senter for global berekraft.
- Eksterne partnarar: Inven2, SINTEF, LMI, Oslo Cancer Cluster, Nansen Neuroscience Network, Oslo universitetssjukehus, Forskingsparken i Oslo og Oslo Science City
Bli med på frukostmøte i Livsvitskapsbygningen 29. oktober og gje innspel til Science Impact 2027
I 2027 vil vi for første gong arrangere Science Impact-konferansen i Livsvitskapsbygningen. Vi inviterer deg som jobbar i bygningen og andre til å gje innspel til format og program no tidleg i planleggingsfasen.
- Les meir og bli med 29. oktober 08:30–09:00!
Kaffi og noko å bite i frå 08:15.
Meld deg på innovasjonskurs i november
Veksthuset for verdiskaping har innovasjonskurs på fleire nivå som skal auke innovasjonskompetansen blant tilsette: stipendiatar, postdoktorar, forskarar og andre tilsette. Målet er å bidra til at meir kunnskap frå forsking blir teken i bruk. Kursa er gratis for UiO-tilsette.
24.–26. november, kl. 09:00–16:00:
Step-up level Idea to Innovation (I2I) course
Vil du lære korleis du gjer innovasjonsideen din om til eit vellukka innovasjonsprosjekt? På dette kurset får du verktøya du treng for å gjere det. Vi ser òg på finansieringsmoglegheiter og søknadsskriving som mogleg neste steg for å utvikle prosjektet vidare.
Påmeldingsfrist: 17. november
Møt oss på innovasjonskaffitid
Her kan forskarar kome innom eller avtale eit møte for å diskutere innovasjonsidéar eller få informasjon om kurs og finansieringsmoglegheiter.
Neste moglegheit 28. oktober kl. 13–15 i biblioteket i første etasje i Livsvitskapsbygninga.
Kontakt oss om du har ein innovasjonsidé i tidleg fase!
Vi byr på skreddarsydd rettleiing og såkornmidlar. Ta kontakt med oss dersom du vil diskutere korleis du kan gå vidare med innovasjonsidéen din i tidleg fase.
Følg oss på LinkedIn
Publisert 26. oktober