Ei kort historie om uteromma på Blindern

Universitetsområdet tek form

1/4

• 
• 
• 
• 

Det var arkitekt Sverre Pedersen som vann konkurransen om å laga ein reguleringsplan for universitetsområdet på Blindern. Pedersen la grunnlaget for ein nyklassisistisk stil, men den måtte tilpassast nye idear om funksjonalitet og enkelheit. 

Dei første bygningane som vart bygde var Farmasibygningen, Astrofysikkbygningen (Svein Rosselands hus) og Fysikkbygningen, som vart teikna av arkitektane Finn Bryn og Johan Ellefsen. Dei ligg langs ein aust-vestgåande akse som er markert med ein lindeallé. 

I Pedersen sin originale plan, var det tenkt at ein sør-nordgåande akse skulle gå frå Frognerparken gjennom Fysikkbygningen og vidare nord. Aksen vart ikkje fullført etter planen og vart i tillegg seinare justert av Frode Rinnan og Olav Tveten på 1960-talet.

60-talet på Øvre Blindern

1/4

• 
• 
• 
• 

I 1958 vann Leif Olav Moen arkitektkonkurransen om å bygga HF-fakultetet med prosjektet "Campus". Det modernistiske forslaget var inspirert av amerikanske universitet. Moen teikna også SV- og MN-kompleksa. Saman med Frode Rinnan og Olav Tveten sine universitetssenter, skapte dei bygningane opnare område med mindre monumentale bygningar.

Hagearkitekt Sverre K. Steine planla grøntområda på Øvre Blindern i tett samarbeid med Moen. Parkanlegget vart byg med brusteinsbelagde plassar og gangvegar, større treplantingar og opne grasflater. I tillegg er det fleire små vasspegl og fontener. Den store fontena ved Frederikkeplassen er sentral i anlegget. Det vart også planta meir enn 600 tre, inkludert lind og platanlønn, for å skapa ein harmonisk heilskap med bygningane. I tråd med ideala frå modernismen, skulle det vera samspel mellom arkitekturen, terrenget og plantane.

Fornying og utbygging

1/4

• 
• 
• 
• 

Den siste store byggeperioden var på 1990-talet, då Helga Engs hus og bibliotekbygninga Georg Sverdrups hus (Telje-Torp-Aasen Arkitektkontor) vart bygde. Landskapsarkitekt Bjarne Aasen planla dei nye uteanlegga som skulle binda saman dei øvre og nedre delane av Blindern.

På sørsida av Blindern vart det opna opp til eit studenttorg, det som no ligg ved Helga Engs hus. Plassen er delvis lukka med formklipte hekkar og buskar, inspirert av klassisk hagekunst. Det nye biblioteket (Georg Sverdrups hus) fekk ein markant fasade og ein trappeveg inspirert av Michelangelos trapper i Roma. Ein ny gangveg over plenen framfor biblioteket kopla området til T-banestasjonen og gjorde plassen framfor Georg Sverdrups hus til eit sentralt punkt i Blindernanlegget.

Vern og vidareføring

På 2010-talet vart det utarbeida verneplanar for statlege undervisnings- og kulturbygg. Blindern vart freda i 2013. Fredinga omfattar store delar av universitetsområda, som skal bevarast både som ein visuell og ein funksjonell del av anlegget. Parkanlegget har utvikla seg gjennom 60 år. Det bevisste vedlikehaldet gjer at det held fram med å veksa og verta frodigare, til stor glede for publikum. Alle varige endringar krev godkjenning frå Riksantikvaren eller Byantikvaren i Oslo.