Kva eksamenar kan du klage på?
- Du kan klage på karakteren på alle skriftlege eksamenar.
- Munnlege eller praktiske eksamenar kan ikkje påklagast når prestasjonen ikkje er dokumentert for ettertida.
- På gruppeeksamenar (to eller fleire studentar) kan deltakarane klage individuelt. Ei eventuell endring i karakteren vil gjelde berre for den som har klaga.
Resultatet frå klagesensuren blir den endelege karakteren og kan vere det same, betre eller dårlegare enn den opphavlege sensuren.
Frist
Tre veker etter at karakteren vart kunngjort (det vil seie publisert i Studentweb).
Dersom du først har bede om grunngjeving for karakteren eller klaga over formelle feil ved eksamen, gjeld fristen frå det tidspunktet du får svar.
Behandlingstid
Klager blir vanlegvis behandla innan ein månad. Dersom det tek lenger tid, får du melding om dette. Når resultatet er klart, får du e-post om at du kan sjå resultatet i Studentweb.
Korleis klage
Du klager på karakteren din i Studentweb. Logg på Studentweb, gå til sida "Begrunnelse og klage" og følg instruksjonane der.
I Studentweb kan du velje om du vil grunngje klagen din. Grunngjevinga blir først tilgjengeleg for sensorane dersom karakteren i klagesensuren avvik med to eller fleire karakterar frå den ordinære sensuren. I desse tilfella vil saken bli vurdert på nytt før den endelege karakteren vert fastsett, jf. universitets- og høyskoleloven § 11-11.
Slik blir klagen behandla
Fakultetet tek imot klagen.
Eksamenssvaret ditt blir vurdert av to nye sensorar. Minst éin av dei nye sensorane er ekstern, det vil seie at vedkomande ikkje er tilsett ved UiO.
Dei nye sensorane får tilsendt eksamenssvaret ditt, oppgåveteksten, sensorrettleiinga og anna nødvendig materiale. Dei får ikkje tilsendt den opphavlege karakteren, sensor si grunngjeving for den opphavlege karakteren eller di grunngjeving for klagen.
Dersom den nye sensuren skil seg frå den opphavlege sensuren med to eller fleire karakterar, vil UiO gjere ei ekstra vurdering før endeleg karakter vert fastsett.
- Ved den ekstra vurderinga får sensorane vite den opphavlege karakteren og den mellombelse klagesensuren, og dei får tilgang til all informasjon om sensuren.
- Dersom du har skrive ei grunngjeving for klagen, får sensorane tilgang til denne no. Dei får også tilgang til sensor si grunngjeving for den opphavlege karakteren.
- Den ekstra vurderinga blir gjort av minst to sensorar der både den opphavlege kommisjonen og klagekommisjonen er representert.
Medan klagesensuren pågår vert eksamenskarakteren din sperra i Studentweb og på karakterutskrifter.
Du har rett til å trekkje klagen din inntil saken er avgjort. Dersom du trekkjer klagen, beheld du den opphavlege karakteren din.
Grunngjeving for klagesensur
Du kan be om grunngjeving for klagesensur, men ikkje klage på resultatet.
Fristen for å be om grunngjeving er innan ei veke frå du fekk kjennskap til karakteren, men likevel ikkje meir enn tre veker frå karakteren vart kunngjort.
For å be om grunngjeving for klagesensuren må du kontakte eininga som tilbyr emnet. Du finn kontaktpunktet i høgremargen på emnesida.
Spørsmål?
- Kontakt studentinfosenteret på fakultetet ditt.
- Student ved Sommerskolen, send epost til iss@admin.uio.no